Baroja entzunaretoa - Bizkaia Aretoa
Avenida Abandoibarra 3. -48009- Bilbo (Bizkaia)
Unibertsitatea, enpresa, enplegu eta gizarterako benetako soluzio bihurtzen diren ideien haztegia. Filosofia horrek gidatu du ZITEK, EHUko Bizkaiko campuseko ekintzailetzari laguntzeko programa, mende laurden honetan. Orain, 25. urteurrena ospatzen ari da, eta unibertsitate inguruneari lotutako enpresa sustapenerako plataforma nagusietako bat da.
2000. urtean Portugaleten sortu zen, eta ondoren Leioa eta Bilbora hedatu. Ordutik, ZITEKek ikasleen belaunaldiei, ikertzaileei eta teknikariei eta kudeaketako eta administrazio eta zerbitzuetako langileei (TEKAZEL) lagundu die ideiak enpresa proiektu bihurtzeko prozesuan. Balantzea adierazgarria da: 150 enpresa inguru sortu dira, ehunka ekimen bultzatu dira eta milaka ibilbide profesional igaro dira bertako haztegietatik.
EHUren, Bizkaiko Foru Aldundiaren eta BEAZen arteko lankidetzaren emaitza da programa, eta ikerketa akademikoaren eta produkzio sarearen arteko zubi bihurtu da. Bertako espazioetan enpresak ez ezik, soluzio berritzaileak ere sortzen dira, unibertsitatean sortutako ezagutza gizarte osoari zabaltzeko asmoz.
Sortutako enpresak kontuan hartuta, egoitzen araberako banaketari dagokionez, Portugalete da nagusi (66 ekimen), eta, ondoren, Leioa (31), Bilbo (17) eta beste toki batzuk (35) daude. Kopuru horiei beste 67 proiektu gehitu behar zaizkie; izan ere, azkenean enpresa gisa eratu ez baziren ere, Ekintzailetza Geletan, hasierako fasean ideiak garatzeko funtsezko espazioan, lan egin zuten.
Gaur egun, ZITEKek hainbat alderditan jarraitzen du lanean, irakasle eta ikertzaileek zein ikasleek bultzatutako enpresekin. Horrez gain, programak eta sariak dinamizatzen ditu, eta horri esker, campusean kultura ekintzailea finkatu da. Think Big lehiaketak (enpresa ideietan oinarritutakoak) 16 edizio izan ditu 2010etik eta 1.121 partaide bildu ditu. Hain zuzen ere, azken deialdia dagoeneko abian dago. Bestalde, Handira Jo sariek, enpresa potentziala duten doktorego tesiei zuzenduek, 43 parte hartzaile izan dituzte hiru ediziotan; Abiatu sariek, berriz, enpresa berritzaileak eta oinarri teknologikoa dutenak sortzera bideratuek, 81 parte hartzaile bildu dituzte bederatzi deialditan.
Abian jarri zenetik hogeita bost urte igaro direnean, ZITEKek berretsi egin du unibertsitate esparruan ekintzailetzaren motor gisa betetzen duen zeregina, eta agerian utzi du unibertsitateak, prestatu ez ezik, sortu, konektatu eta eraldatu ere egiten duela.
Ekitaldian, beste agintari batzuekin batera, Ane Miren de Ariño Otxoa Eusko Jaurlaritzako Ekintzailetza eta Nazioartekotze zuzendaria, Ainara Basurko Ekonomia Sustapeneko foru diputatua, Estitxu Garai EHUko Bizkaiko campuseko errektoreordea eta Joxerramon Bengoetxea EHUko errektorea izango dira.
Ekitaldiko egitaraua
Ekitaldia 09:00etan hasiko da, agintariei egindako aurrerarekin eta, jarraian, argazki instituzionala egingo dute photocallean. Ondoren egingo da ekitaldiaren irekiera ofiziala, eta ongietorria emateaz Estitxu Garai errektoreordea arduratuko da. Erakunde mailako esku-hartzeak iritsiko dira jarraian eta, bukaeran, Joxerramon Bengoetxea errektoreak hartuko du hitza.
10:00etatik aurrera, aitortzen tartea iritsiko da eta EHUren unibertsitate ingurunean sortu diren eta garapen nabarmena lortu duten hamar enpresaren ibilbideari balioa emango diote. Gerora, unibertsitatean ekintzailetza bultzatu duten irakasleek, ikertzaileek eta TEKAZELek, eta proiektu esanguratsuenetan ikasleek egindako lana aitortuko dute.
Ekitaldiari amaiera emateko, errektoreak eskainiko du azken hitzaldia, 10:15ean. 10:30ean, taldeko argazkia aterako da Bizkaia Aretoko terrazan, eta, ondoren, luncha eta topaketa egingo dira Laboa aretoan.